Mga Balod Sa Dagat

[Lubi]

.










Mga Balod Sa Dagat
Mga balod sa dagat, sama sa kinabuhi
Usahay malinawon, usahay malisod
Sama sa kinabuhi kon dunay kagul-anan
Human sa mga luha adunay kahupayan

Mga balod sa dagat, bisa’g huypon sa hangin
Dili mosalibwag, gisapnay sa baybayon
Bisan may kalisdanan huptan ta ang paglaom
Kay gani ang kangitngit may kaadlawon.

Mga balod sa dagat, kanato nagtawag
Sila nagpahinumdom, nag-awhag sa tanan
Sundan sa atong dalan gitawag sa Ginoo
Ang Iyang mga pulong iwag ning kinabuhi

Magduyog ang tanan sa pagdayeg Kaniya
Ang bugtong tang kalipay, ang bugtong tang paglaom
Atong hinumdoman mga balod sa dagat
Kutawon man sa hangin apan nagmaya.

[EMMA S. BASTASA]

mga balod sa dagat
madungog ko ang imong tingog
mga balod sa dagat

mabati ko ang imong tilap
sa akong mga tiil sa akong paa
mga balod sa dagat

mga balod sa dagat
sa akong pagkatulog
misulod ang mga balod sa dagat
sa akong mga damgo

mga asul nga dila
mga puti nga mga bula
mga balod sa dagat
sa akong dughan
sa imong bilahan

mga balod sa dagat
nga gusto nakong makalimtan
sa bagyo sa akong kinabuhi

kusog nga hangin
mga lubi nga mibayog
mihalok sa yuta

mga balod sa dagat
mga handurawan nga nangaanod
mga balod sa dagat
miwaswas sa akong mga tinguha
mihaw-as sa akong kahaw-ang
mipuno sa akong akong kahadlok
milumos sa akong kahigwaos

mga balod sa dagat
oyayi ni nanay
mabati ko ang pagtikbas ni
tatay sa mga balod sa dagat
sa iyang bugsay

pagkadaghan sa mga balod sa dagat
walay pagkahurot walay katapusan

[Lubi]

Kinutlo gikan sa lapyahan sa pikas tampi, bahin gihapon ni sa mga balod sa dagat

enjoy,
Lubi

-------
Halok sa Lapyahan

Nagdumili nga mohalok, giuhaw sa kahiladman nga ulianan sa tanan
nga panahom kun sugilanon. Ang balak
dili buot mabahaw ang mga kagahapon nga
usahay motumaw matag karon, makigsayaw
sa yogyog sa tambol nga nahubog sa lanog sa
kaugalingong tunob. Ug Mitungha ang kahayag
sa adlaw nga miduaw sa gialimongawang damgo
kon tinuod ba ang tanan nga mitumaw sa kahilom.

Hapdos ang dughan sa napukaw nga kamingaw sa
higala nga mipanaw sa kasadpan, nga dugay ng wa
mahimamat pag-usab, usa ka laylay sa kagahapon,
makakabig gyod sa katam-is sa paghalad sa talad-
halaran sa kahidlaw, tuboran sa mga tanghaga sa
kahiladman, nga sama sa pughawng dagat nga gi-
uhaw sa dula kun pasundayag sa parat-parat og
lami-lami nga kinabuhi. Ang halok sa aping sa

Lapyahan, kamatayon sa balod. Human og
kiay-kiay, layog-layog sa panahon, bisan
makab-ot ang gitinguha nga lapyahan,
ang damgo mahanaw ra gihapon, sa
init sa adlaw matunaw, mahiuli sa
gihapon, balik sa kahiladman,
sa walay katagbawan nga
kahidlaw, hangtod nga
mahimatngonan, diay
ang balod ug dagat,
dili duha ka binuhat,
diay Usa ra, nahiusa
sa kanunay. Ug ang
mga kiaykiay sa balod
nga nalumay sa kalipay,
nga naghandom sa halok
sa lapyahan, mosapnay sa mga
balas sa iyang kulamoy ug dughan,
mohalok sa ngabil sa baybayon, ug aron
lang diay mahibulong...tanang butang lumalabay.

Kamatayon sa balod ang halok sa
lapyahan. Ang katumanan sa damgo ug
tingusbawan, maoy iyang kataposan. Mahigmata,
hinaot pa unta, sa iyang paghiuli sa
kahiladman, sa kahimatngonan nga way
katugkaran. Diay, dili siya usa ka balod, diay Siya...

Ang Dagat, nagasapnay sa tanang
balod sa kinabuhi. Siya ang kaalam nga
nagatan-aw sa tanang kahibulongan. Siya
ang buhing kahimatngonan,
nga taliwala sa kahilom,
nagatungha, nagaduaw,
nagatan-aw sa
tanang pasundayag
sa kamatayon
ug pagkabanhaw,
nagapahiyom
sa balod nga
gadumili
paghalok sa
lapya-
han.
..
.

Akoy
2006.3.3

[Lubi]

Pinunitan sa Lapyahan sa Habagatan

kalingawi og basa,
Lubi
-------



2006/03/03
Ang Halok sa Lapyahan
Nagdumili nga mohalok, giuhaw
sa kahiladman nga ulianan sa tanan
nga panahom kun sugilanon. Ang balak
dili buot mabahaw ang mga kagahapon nga
usahay motumaw matag karon, makigsayaw
sa yogyog sa tambol nga nahubog sa lanog sa
kaugalingong tunob. Ug Mitungha ang kahayag
sa adlaw nga miduaw sa gialimongawang damgo
kon tinuod ba ang tanan nga mitumaw sa kahilom.

Hapdos ang dughan sa napukaw nga kamingaw sa
higala nga mipanaw sa kasadpan, nga dugay ng wa
mahimamat pag-usab, usa ka laylay sa kagahapon,
makakabig gyod sa katam-is sa paghalad sa talad-
halaran sa kahidlaw, tuboran sa mga tanghaga sa
kahiladman, nga sama sa pughawng dagat nga gi-
uhaw sa dula kun pasundayag sa parat-parat og
lami-lami nga kinabuhi. Ang halok sa aping sa

Lapyahan, kamatayon sa balod. Human og
kiay-kiay, layog-layog sa panahon, bisan
makab-ot ang gitinguha nga lapyahan,
ang damgo mahanaw ra gihapon, sa
init sa adlaw matunaw, mahiuli sa
gihapon, balik sa kahiladman,
sa walay katagbawan nga
kahidlaw, hangtod nga
mahimatngonan, diay
ang balod ug dagat,
dili duha ka binuhat,
diay Usa ra, nahiusa
sa kanunay. Ug ang
mga kiaykiay sa balod
nga nalumay sa kalipay,
nga naghandom sa halok
sa lapyahan, mosapnay sa mga
balas sa iyang kulamoy ug dughan,
mohalok sa ngabil sa baybayon, ug aron
lang diay mahibulong...tanang butang lumalabay.

Kamatayon sa balod ang halok sa
lapyahan. Ang katumanan sa damgo ug
tingusbawan, maoy iyang kataposan. Mahigmata,
hinaot pa unta, sa iyang paghiuli sa
kahiladman, sa kahimatngonan nga way
katugkaran. Diay, dili siya usa ka balod, diay Siya...

Ang Dagat, nagasapnay sa tanang
balod sa kinabuhi. Siya ang kaalam nga
nagatan-aw sa tanang kahibulongan. Siya
ang buhing kahimatngonan,
nga taliwala sa kahilom,
nagatungha, nagaduaw,
nagatan-aw sa
tanang pasundayag
sa kamatayon
ug pagkabanhaw,
nagapahiyom
sa balod nga
gadumili
paghalok sa
lapya-
han.
..
.

Akoy
2006.3.3

[EMMA S. BASTASA]

pagkanindot kaayo sa imong balak kuya..
feeling high jud ko

[Lubi]

:-)basta bisdak ganahan sa mga balod sa dagat, gahandom sa lapyahan, kay dagatnon kun dumagat :-)